مهما تغيب وتبتعد

مهما تغيب وتبتعد مهما تزودني جفا         
ما ينتهي فيني شعورٍ لك مثل زخ المطر .

عشقي يزيد بغيبتك والشوق ماعمره خفا           
بالعكس كلما يفقدك يزداد وفي ،جوفه قهر .

والصبر ناويني دهر ما مل من قولة: "كَفا"         
طول الوقت جالس معي صبرٍ ولكنه صبر .

طفلٍ يتيم وكلما دمع على صدري غفا         
كسّر مجاديف الحزن فيني ونساني الكدر .







لين يغزيني الأمل "يا حي زوله لا لفا"         
ما غيره يهدي وسع ضيقٍ بأنفاسي انتثر .

طيّب خفوقٍ ميتٍ حيره ولا مسه شفا         
حاضر ولكنه معك ما كن عمره بي حضر .

يندب بحظٍ مثلجٍ ما يعرف بيومه دفا         
يبكي على حاله ولا منه عوى لام القدر .

نفسه وحيده والفرح في داخله ضيٍ طفا         
من حرقته ودعني موصي تشهد واحتضر .

عزاه ياروحٍ تردد .. "من غيابه مكـتـفا"         
طوّل عليّه من هذاك اليوم له شهر وشهر .

شيٍ واكيده من شفايا منطقي جالك صفا         
لو طال عمري في غيابك أشهد إن عمري قصر .