تزعل وأراضيك وأتلذذ بتزعيلك

تزعل وأراضيك وأتلذذ بتزعيلك
تبي الصراحة؟ أنا مجنون زعلاتك


لا قمت تبعد وأنا أقرب وأدني لك
وأمسك طرف غترتي وامش دمعاتك


وتبدي تعاتب وأنا كل انتباهي لك
ما أسمعك شتقول أنا عيني على شفاتك


وتعيد حكيك وتفرك حيل منديلك
وتخالطت صادق حروفك بوناتك

وأحاول أرضيك ومدري منين أبدي لك
وأحتار وأذكرك في بعض زلاتك


وأسمعك ما كتبته بك وأغني لك
طاروقك اللي تحبه وأكسر سكاتك


واستسمحك وأعذرك وأسمعك وأشكي لك
وأتلهف لبسمتك .. ورد ضحكاتك


يسرقني الوقت ولا يمديني أحكي لك
كلام اللي تحفظته .. لشوفاتك


وقت الوعد فات وعيوني تراعي لك
وقفيت وأشغلت القلب بالتفاتك


عيني على خطوتك والقلب يدعي لك
الله يحفظك من الحاسد .. وشماتك


تزعل وأراضيك وأتلذذ بتزعيلك
تبي الصراحة؟ أنا أعشق كل حالاتك